دام الزمن ياناس قسمه ونصيب .. والحظ مره يصيب ومره مايل
ليه أنا حظي دايم مايصيب .. وليه حظي أنا يهوى التحايل
كل مالمحت الفرح مني قريب .. يطلع فرحي سراب عني زايل
يازمن حس فيني ترى حالي عصيب .. الله وحده عالم اشقد هم شايل
والله وحده حسيبي ماغيره حسيب .. أحتسب عنده الأجر ويا البدايل
حلفت ماشكي لحد همي لين اشيب .. لاقلت اشفيك قلت لا ماني قايل
أنا الي همه صنع منه أديب .. وعلمه إن البشر أنواع وفصايل 
ولأني بين ذيابه عشت صرت ذيب .. إذا وروني عمل اوريهم عمايل
صحيح أنا شخص عادي لامهندس ولاطبيب .. بس أهم شي مالحد عندي جمايل
عشت عزيز نفس وبين أهلي غريب .. وعشت بنفسي أحصي لنفسي الخصايل
ومن جود غيثي وترابي الخصيب .. استوت زروع وشجر ويا فسايل